S’Eichhölzli durab hät’s ä beliebti Piste,
ned nu dä Usblick freut d’Automobiliste.
Uf Steckbore abebloche isch rasant,
für ä Rennpiste üsserst interessant!

Im 55i händ da ä paar Autofründ dänkt,
und am Bergrenne so ’s Läbe gschenkt.
Au 62 sind d’Bolide dä Beton abknatteret
Motore händ gröhret und d Piste gratteret.

Vor zwanzg Johr händ Oldtimer-Fründe
die zündend Idee gha, en Verein z g’ründe
und Automobil vo verschiedene Natione
zum „Revival“ izlade, us alte Generatione.

So Oldies händ doch no echt Charme,
wohre Liebhaber wird’s um’s Herz warm,
d’Liedeschaft für Chrom hebet ä Läbe lang
füg Lagg vo Fiat, Opel, Chevy und Mustang.

Im Corso sind d’Prunktstück z’bewundere,
wenn röhrend sie tüend berguf tunndere.
Bisch au kein Fründ vo Autoemissione,
lose, luege, schmöcke tuet sich lohne!

Über 100i sind die ältischte Modell,
d’Entwicklig vo dä Auto boomet schnell.
Bald sind’s die reinschte Bombegschoss,
’s Läbe wird rasend rasant uf dä Stross.

Da Johr findet’s Jubiläumsmemorial statt,
sorgt für alti und selteni Bolide i dä Stadt.
A dä Rennstrecki verwiele und stuune,
diskutiere bi Spies und Trank hebt d’Luune.

Äs passends Outfit zu Buick und Benz,
Schöne und Edli machet sich Konkurrenz!
Grösse us em Rennsport chasch befroge
oder als Fahrgast au ämol ä Rundi woge.

‚S Mueseum im Turmhof zeigt ä Usstellig,
präsentiert allerlei zum Thema augegfällig.
Ä mängs Detail git’s do vo nöchem z’gseh,
au no über Motorräder erfahrt mä meh.

Und magsch selber a däm Spektakel si,
laded d’Fründe vom Bergrenne herzlich i:
Am 22./23.8. übernehmed d Oldies ’s Stür,
z’Steckboren, zum „Jubiläumsrenne“ hür.

Ganz herzlichen Dank für das sehr tolle, wertvolle Gedicht, Jeanette Eymann!